По благословению епископа Рыбинского
и Романово-Борисоглебского Вениамина

День памяти святого равноапостольного князя Владимира

28 июля, в день памяти святого равноапостольного князя Владимира, братские народы России, Украины и Белоруссии отмечают памятную дату — День Крещения Руси.

Радость празднования этого события с нами разделяют и все те, кто неравнодушен к славянской истории и культуре, для кого опыт христианских подвижников древней Руси и подвиг новомучеников и исповедников веры XX столетия являются зримым воплощением образа Святой Руси — нашего единого духовного Отечества.

По благословению Святейшего Патриарха Московского и всея Руси Кирилла в этот памятный день надлежит ежегодно совершать торжественные богослужения с 15 минутным праздничным звоном "Благовест" в 12.00 во всех храмах Русской Православной Церкви с совершением по окончании Литургии молебна по особому чину. (Последование молебного пения в праздник св. равноап. кн. Владимира — воспоминания Крещения Руси прилагается.)

Последование молебного пения в праздник святого равноапостольного князя Владимира — Воспоминание крещения Руси.

Диакон: Благослови Владыко.

Предстоятель: Благословен Бог наш…

Певцы: Аминь.

Диакон: Слава Тебе, Боже наш, слава Тебе.

Хор: Царю Небесный…

Диакон: Бог Господь и явися нам, благословен Грядый во Имя Господне.

Стих: Исповедайтеся Господеви, яко Благ, яко в век милость Его.

Стих: Обышедше, обыдоша мя, и Именем Господним противляхся им.

Стих: Не умру, но жив буду и повем дела Господня.

Стих: Камень, егоже небрегоша зиждущии, сей бысть во главу угла: от Господа бысть сей и есть дивен во очесах наших.

Хор: Бог Господь: во глас 4?й

Таже тропари: Живоначальной Троице, глас 8

Благословен еси, Христе Боже наш, / Иже премудры ловцы явлей, / ниспослав им Духа Святаго, / и теми уловлей вселенную, // Человеколюбче слава Тебе.

Всем святым в земле Российстей просиявшим, глас 8

Якоже плод красный Твоего спасительного сеяния, / Земля Русская приносит Ти, Господи, вся святыя, в той просиявшия. / Тех молитвами в мире глубоце // Церковь и страну нашу Богородицею соблюди, Многомилостиве.

Крещения Руси, глас 8

Благословен еси, Христе Боже наш, / Землю Русскую Крещением просветивый, / людем ея низпослав Духа Святаго, / ихже и ко спасению приведый, // Человеколюбче, слава Тебе.

Равноап. кн. Владимиру, глас 4

Уподобился еси купцу, ищущему добраго бисера, / славнодержавный Владимире, / на высоте стола седя матере градов, Богоспасаемаго Киева, / испытуя же и посылая к Царскому граду уведети православную веру, / обрел еси безценный бисер, Христа, / избравшаго тя, яко втораго Павла, / и оттрясшаго слепоту во святей купели, / душевную вкупе и телесную. / Темже празднуем твое успение, / людие твои суще: // моли спастися душам нашим.

Запевы: Пресвятая Троице, Боже наш, слава Тебе.

Вси святии земли нашея, молите Бога о нас.

Святый равноапостольный великий княже Владимире, моли Бога о нас.

По запевах прокимен: Вознесох избраннаго от людей Моих.

Стих: Ибо десница Моя заступит его.

Диакон: И о сподобитися нам слышанию святаго Евангелия, Господа Бога молим.

Хор: Господи помилуй (трижды).

Предстоятель: От Матфеа святаго Евангелия чтение.

Евангелие от Матфея, 55 зачало.

Хор: Слава Тебе Господи, слава Тебе.

По Евангелии запевы, затем:

Достойно есть, яко воистину, блажити Тя, Богородицу, Присноблаженную и Пренепорочную и Матерь Бога нашего, Честнейшую херувим и Славнейшую без сравнения серафим, без истления Бога Слова рождшую, сущую Богородицу Тя величаем.

Диакон: Помилуй нас, Боже, по велицей милости Твоей, молим Ти ся, услыши и помилуй.

Хор (зде и далее): Господи помилуй (трижды).

Еще молимся о великом Господине и Отце нашем Святейшем Патриархе Кирилле, о господине Высокопреосвященнейшем митрополите Пантелеимоне, и о господине нашем Преосвященнейшем епископе Вениамине и о всей во Христе братии нашей.

Благодаряще со страхом и трепетом, яко раби непотребнии, Твоему благоутробию, Спасе и Владыко наш Господи, о Твоих благодеяниих, яже излиял еси на Землю нашу от Крещения ея и до ныне, и припадаем, и славословие Тебе, яко Богу, приносим, и умиленно вопием: избави от всех бед люди Твоя и всегда, яко Милостив, исполни во благих прошения наша, прилежно молимся Тебе, услыши и помилуй.

Еще молимся Тебе, Спасителю нашему, чрез благовернаго князя Владимира благоволившему избрати род наш в наследие Свое и в купели Крещения даровати Духа Святаго, о еже Церковь нашу Святую от расколов и нестроений соблюсти, и в единомыслии веры ея утвердити, и миром оградити, услыши и помилуй.

Еще молимся Тебе, Господи Вседержителю, о еже призрети и утвердити виноград сей, егоже насади и сохрани от всех наветов вражиих десница Твоя; и в предняя лета даруй наследию Твоему мир и безмятежие, да не умалится и не поколеблется Русь Святая, юже избрал еси в жилище Себе, да славится Трисвятое Имя Твое, услыши и помилуй.

Давый заповедь Твою нам, еже любити Тебе, Бога нашего, и ближняго своего, сотвори, да ненависти, вражды, обиды и прочая беззакония прекратятся, истинная же любовь да царствует в сердцах наших, молим Ти ся, Спасителю наш, услыши и милостивно помилуй.

Предстоятель: Услыши ны, Боже, Спасителю наш, упование всех концев земли и сущих в мори далече, и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.

Хор: Аминь.

Диакон: Господу помолимся.

Хор: Господи, помилуй.

Предстоятель чтет молитву:

Триипостасный Боже, Отче Вседержителю, Сыне Единородный, Спасителю мира, и Душе Святый, просвещаяй и освящаяй племена и народы! Иже и владыку Земли Русския, князя Владимира, к свету истинныя веры наставивый, и тем всю страну нашу Крещением просветивый, и сонмом святых, яко пресветлым звездам, небо Церкве нашея украсившим, возсияти даровавый! И нам, смиренным и недостойным чадом их, ныне предстоящим славе Твоей и благодарственное молебное пение приносящим в сей день Крещения Руси, великую милость даровавый, еже славити, хвалити и благодарение приносити Тебе за вся благодеяния, бывшая на Руси от лет древних и до ныне. Призри на ниву Твою, Церковь Святую, на страны и народы, преемственно воспринявшие веру православную из единой купели Крещения в водах днепровских и ныне приносящих Тебе, якоже прекрасный плод спасительнаго сеяния Слова Твоего, лики святых. Тии бо послужиша людем своим верою, надеждою и любовию, образом слова и жития указующе нам путь к совершенству по заповеди Христовой: будите убо совершени, яко же и Отец ваш Небесный совершен есть. Сохраняюще сие святое наследие их, молимся Тя, Жизнодавче: спаси и помилуй нас, мир миру Твоему даруй и всему созданию Твоему, егоже по грехом нашим сыны века сего погубити тщатся. Вемы бо, яко не хощеши смерти грешников, но еже обратитися и живым им быти; призри на нас, во гресех пребывающих, отврати гнев Твой, праведно движимый на ны, даруй нам покаяние и Твоим неизреченным милосердием помилуй нас. Приими молитвы и труды наша о умножении любве среди всех людей мира сего. Землю нашу огради, власти умудри, вся утеши и умири, Церковь Твою возрасти, достояние Твое соблюди, мужи и жены, и младенцы благодатию просвети, и вся люди Твоя в Православии и благочестии утверди молитвами Пречистыя Владычицы нашея Богородицы и Приснодевы Марии, силою Честнаго и Животворящаго Креста и Всех святых, в Земли нашей просиявших, да в единении веры и любве славим Тя, Отца и Сына и Святаго Духа, во веки веков.

Хор: Аминь.

Величаем тя, / святый равноапостольный великий княже Владимире, / и чтим святую память твою, / идолы попавшаго // и всю землю Русскую Святым Крещением просветившаго.

Диакон: Премудрость.

Священник: Пресвятая Богородице, спаси нас.

Хор: Честнейшую херувим и славнейшую без сравнения серафим, без истления Бога Слова рождшую, сущую Богородицу Тя величаем.

Священник: Слава Тебе, Христе Боже, Упование наше, слава Тебе.

Предстоятель: Отпуст

Диакон: Великому Господину и Отцу нашему Кириллу, Святейшему Патриарху Московскому и всея Руси и Свято-Троицкия Сергиевой Лавры священно-архимандриту, и господину Высокопреосвященнейшему Пантелеимону, митрополиту Ярославскому и Ростовскому и Спасо-Яковлевския Димитриевы обители священноархимандриту, и госоподину нашему Преосвященнейшему Вениамину, епископу Рыбинскому и Угличскому и Воскресенския Угличския обители священноархимандриту с богоспасаемою их паствою, Богохранимей стране нашей, властем, воинству и народам ея, всему освященному собору, благочестия ревнителем и учителем, и всем во Православии Земли нашей подвизающимся словом, писанием, учением и богоугодным житием, и всем православным христианом — многая лета.

Хор: Многая лета.